Thursday 28 March 2013

උදයංගනී .....





උදයංගනී තෙන්නකෝන්
1980 - 2012

..දෙපස සුදු දද නඟන 
නිමල සුදු වැලි ඉසින
මහ මගින පෙරහරින 
ඇය රැගෙන අපි ගියෙමු ..

..ඈත අහසේ ඉහළ 
සුදු වලා පෙළ ගැසිණ ..

...ඇයගෙ නව කුටිය මත 
තුඟු විසල් කුඹ ටැඹින් 
නැගුනු සුදු දුම් රොටුව 
සාන්තව ඉහළ නැග 
ඒ වලාකුළු අතර 
අතුරුදන් වී ගියෙය...

..දැඩි හිරු රැසින් මිරිකෙන්නට පෙර නිවෙන 
පිණි බිඳුවක් ලෙසට ඔබ අහසට නැගින...

-වසන්තා - මහගම සේකර - සක්වා ලිහිණි-

වැවට කළුවර යා වුනා 
සංසාර දුක බෝවුනා 
නෙලූ මල් මිට ඉහිරුණා 
එහා ඉවුරට පා වුනා 

- රත්න ශ්‍රී -




Tuesday 26 March 2013

මහගම සේකර.....


මම හෂිත රුවන් වෙමි. මගේ නමට රුවන් කෑල්ලක් ඈඳුනේ අපේ අම්මා මේ සින්දුවට පණ ඇරලා ආසා කළ නිසාත්, තාත්තා පාසලේදී මේ සින්දුව කියපු ගෑණු ළමයාව කසාදබැන්ද නිසාත් ය. 

මට ගෙදරට නමක් විය.. එය අපේ ගෙදර ලිපිනයේ නමද විය, ගේ ඉදිරිපිට කුඩා තහඩු කෑල්ලක 'තුෂාර' කියා ලියා එල්ලා තිබුණි. ගමේ කිසිවෙක් මා හඳුන්වන්නේ තුෂාර කියා මිස වෙන නමකින් නොවේ.එයද මේ ගීය ඇසුරිනි.  


අපේ දුව නැලවුනේ ද මේ ගීය අසමිනි.. දැන් ඇයද රුවන් වලා දුහුල් කඩින් කියන හැටි ඉගෙන ගනිමින් සිටී. 
ඒ අපේ ගෙදර උන්දෑද මගේ නැන්දම්මාද රුවන් වලා දුහුල් කඩින් නිතර ගයන එහි ප්‍රේමණීය රසිකාවන් වූ නිසාය.


මහගම සේකර අපේ ජීවිත වලට බලපෑවේ ඔන්න ඔය අයුරිනි. 

ස්තුතිය : ගි පද රූපය: මානෙල් ප්‍රනාන්දු


Wednesday 13 March 2013

දහයයි...



ආදරණීය දුවේ..
වරක් ලන්ඩනයේ පරණ පොත් සාප්පුවක පොත් ගරමින් සිටියදී මට ශ්‍රී නේරු සිරගතව  සිටිය දී සිය දියණිය ඉන්දිරාට ලෝක ඉතිහාසයේ සිද්ධි අලලා ලියූ "Glimpses of World History" පොතේ 1942 මුල් අමෙරිකානු මුද්‍රණයේ පිටපතක්  හමු විය. ඉන්දියානු නිදහස් අරගලය ඇවිලෙමින් තිබූ සමයේ, 1945 වසරේ නත්තල් තෑග්ගක් ලෙස කෙනෙකු ලියා තිබූ සටහනක් එහි දෙවනි පිටුවේ වෙයි.

Merry Xmas, 1945
To Cliff who is 'sensible' at a distance of several thousand miles.
your,
Wynona

දැන් ඔබ දහ හැවිරිදිය. ලෝක ඉතිහාසයේ විවිධ තැන් හාරා අවුස්සා පිළිතුරු දීමට කල් ගත වන ප්‍රශ්න අසනු සතුටින් බලා ඉමි.

මම ඒ පොතේ අග පිටුවේ මෙසේ සටහනක් තැබුවෙමි.

2007/ ජූනි,
මා මෙය ලියන විට ඔබ අකුරු ඇහිඳින දැරියකි. යම් දිනෙක මේ පොත ඔබ විසින් කියවනු ඇත. මම ශ්‍රී නේරු මෙන් චින්තකයෙකු, සටන්කාමියෙකු, ශ්‍රේෂ්ඨයෙකු නොවෙමි. නමුත් ඔබ ඉන්දිරාට වඩා හොඳ කෙනෙකු වන බව මට විශ්වාසය.

තාත්තා....  

2013 මාර්තු.